“Манчестер Сити” юлдузлари Ҳусановни қандай ҳимоя қиляпти?

Абдуқодир Ҳусанов Англия Премьер-лигасидаги дебют учрашувидаёқ қўпол хатоларга йўл қўйди. Хусусан, “Челси”нинг қарши учрашувнинг дастлабки беш дақиқасида ҳаяжонини енга олмаган ёш ҳимоячи “Манчестер Сити” дарвозасига киритилган ягона голга сабабчи бўлди, бир дақиқадан кейин қўполлиги учун сариқ карточка олди ва яна тўп узатишлари аниқ чиқмади.

Ҳамюртимиз бахтига “шаҳарликлар” рақиб дарвозасига учта тўп киритиб, мағлубиятни ғалабага айлантириб юборди.

“Манчестер Сити” бош мураббийи Хосеп Гвардиола, асосий тўпурар Эрлинг Холанд ўзбек легионерини қўллаб-қувватлаб, илиқ гапларни айтди, “Этихад” стадионидаги мухлислар Абдуқодирни олқишлар билан кузатиб қўйди.

Манчестерликларнинг етакчи ҳимоячиларидан швейрациялик Мануэль Аканжи ҳам Абдуқодир Ҳусанов ҳимоячи учун ўз фикрларини билдириб ўтди. Аканжи легионеримиз билан бирга ҳимоя марказида ўйнаган эди.

- Ўйин давомида мен Абдуқодир Ҳусановни ҳимоя қилишга, ҳақиқатан янада қийин аҳволга тушиб қоладиган вазиятларни юзага келишига йўл қўймасликка ҳаракат қилдим. Айниқса, “Челси” сингари кучли жамоа ва индивидуал маҳорати юқори футболчиларга қарши ўйнаш жуда мураккаб экани учун буни инобатга олишим керак эди.

Дастлабки дақиқалардаги воқеалардан кейин мун Ҳусановга бўлиб ўтган нарсалар ҳақида кўп ўйланмасликни, ўйинни давом эттириш кераклигини тушунтирдим. Кейинги гал Эдерсонга қўрқмай пас бериши мумкинлигини, навбатдаги тўқнашувни ютса, ўзига бўлган ишончи ошишини айтдим.

Бўлган ишларнинг барчасини табиий ҳол сифатида баҳолаш лозим.

Албатта, старт идеал чиқмади, лекин Абдуқодир жуда тез ва яхши даражада тиклана олди. “Челси”дек қудратли рақиб билан ўз мухлисларинг кўз ўнида ўйнаш осон эмас. Биз Ҳусановни майдоннинг ўзидаёқ қўллаб-қувватлашга уриндик ва уёғига ёш футболчи яхши ўйнаб кетди.

Абдуқодир ўзининг энг зўр ўйинини кўрсатишга уринди, бунинг учун ҳали олдинда жуда кўп учрашувлар бор, уларда албатта ўз маҳоратини намойиш қила олади.

Бош мураббий Хосеп Гвардиола Ҳусанов билан гаплашиш учун “рус ёки ўзбек тилини ўрганишимиз керак” деди, лекин бу муаммо бўлмайди.

Абдуқодир французчага қараганда инглиз тилини яхшироқ тушуниши айтди, шу боис мен у билан инглизча мулоқот қиляпман.  У тез орада инглиз тилидаги билимларини кучайтириб олади, чунки мулоқот қилишни ўрганиши энг аввало ўзи учун керак.

Айниқса, тил билиш биз – марказий  ҳимоячилар учун зарур, чунки жамоадошларимизга кўпроқ ёрдам беришимиз талаб этилади.

Бу борада Абдуқодир кўп нарсани тушунади, лекин яхши гапира олмайди, бу ўткинчи ҳолат, ҳали ҳаммаси ўз жойига тушиб кетади, - деди Мануэль Аканжи.