“Манчестер Юнайтед”ни Рунига топширинглар!

“Манчестер Юнайтед”нинг собиқ ҳужумчиси Димитар Бербатов жамоани клуб тарихидаги энг зўр тўпурар Уэйн Руни бошқариши кераклигини таъкидлади.

Яқинда Руни “Бирмингем” бош мураббийлигидан ҳайдалган эди. Уэйн Чемпионшипда атиги 83 кун фаолият юритди. Унинг қўл остида жамоа 15 та учрашув ўтказди. Улардан фақат иккитасида ғалаба қозонилди. Жамоа кучли олтиликдан 20-ўринга тушиб қолди.

Рунининг АҚШ чемпионатидаги фаолияти ҳам муваффақиятли чиқмаган эди. Англиялик мутахассис “Ди Си Юнайтед” бош мураббийи сифатида ҳеч нарсага эрига олмаганди.

Шунга қарамай, Дмитар Бербатов мураббий сифатида собиқ жамоасига ёрдам бера олишига ишонмоқда.

- Рунининг фаолияти шундай ҳолатга келгани ачинарли. Мен унинг мухлисиман, чунки у бош мураббий бўлишни исташини яхши биламан. Бир кун келиб у “Манчестер Юнайтед”ни бошқариши керак , - деди Дмитар Бербатов.