Manchesterliklar 18 yoshli vunderkindni oladi

«Vulverxempton»ning yosh hujumkor yarim himoyachisi Mateus Mane yaqin vaqt ichida «Manchester Yunayted» safiga o‘tishi mumkin.

Futbol olamida yaxshi tanilgan insayder Ekrem Konurning xabar berishicha, manchesterliklar 18 yoshli portugalialik futbolchi uchun rasmiy taklif tayyorlamoqda. Mane o‘yinini «Liverpul» skautlari ham diqqat bilan kuzatib bormoqda.

Shu bilan birga, «Vulverxempton» klubi o‘zining eng istiqbolli futbolchilaridan birini sotishga shoshilmayapti. Angliya klubi Mane transfer qiymatini taxminan 41 million yevro atrofida baholamoqda.

O‘tgan mavsumda Mateus Mane barcha musobaqalarni hisobga olganda 45 ta o‘yinda maydonga tushdi. U shu davr mobaynida sakkizta gol urdi va oltita golli uzatma muallifiga aylandi.

Yosh yarim himoyachining «Vulverxempton» bilan amaldagi shartnomasi 2029 yilning o‘rtalarigacha mo‘ljallangan.