Marrada kim birinchi?

Engil atletika bo‘yicha U18 yosh toifasida mamlakatimiz sharafini munosib himoya qiluvchi atletlarni saralash maqsadida o‘tkazilayotgan musobaqada navbatdagi g‘olib va sovrindorlar aniqlandi.

Qizlar o‘rtasidagi 200, 800 va 1500 metrga yugurish bellashuvlarida Muhayyo Gulmuradova, Dinara Aminova va Marjona Saydullaeva marra chizig‘ini birinchi bo‘lib bosib o‘tdi. 400 metr masofaga o‘tkazilgan to‘siqlar osha yugurishda Shodiyona Rahmonova oltin medalni qo‘lga kiritdi. Uch hatlab sakrashda Elyanura Olimboeva, yadro va bosqon uloqtirishda Parizod Abdullaeva hamda Shahribonu Zaripova shohsupaning eng yuqori pog‘onasidan joy olgan bo‘lsa, ettikurashda Sofiya Nikolaevaga teng keladigani topilmadi.

U18 yosh toifasidagi yigitlar orasida 200 va 1500 metr masofaga yugurish bellashuvlarida Hasanboy Durdiboev va Alibek Abdullaev, 400 metrga to‘siqlar osha yugurishda Zayniddin Ravshanov g‘alaba qozondi.

Langar cho‘pga tayanib va uch hatlab sakrashda Roman Kornev va Radmir Zaripov kabi atletlar tengsiz bo‘ldi. Yadro va bosqon uloqtirish bahslarida Oybek Zarifjonov hamda Muhammadaziz Nosirov barcha raqiblarini ortda qoldirdi. O‘nkurashda Jahongir Jo‘raboev 6176 ball to‘plagan holda birinchilikni egalladi.