Мавсум тугагач, "Шахтёр"да қолмоқчи эмасман - Жасур Яхшибоев янги режалари ҳақида гапирди! Унинг олдида жиддий таклифлар турибди

Жасур Яхшибоев яна катта саҳнада! Ҳамюртингнинг ўзга юртда голлар уриб, мақтовларга сазовор бўлаётганини кўриш нақадар ёқимли-а? Яхшибоев Беларусь чемпионатида энг яхши легионерлардан бири сифатида яққол ажралиб турибди. Бу эса биз учун ҳам фахр туйғусини беради.

Шундай пайтларда эса Жасурдан янада кўпроғини кутгимиз келади ва бундан ҳам кучлироқ чемпионатларда ўйнашини истаймиз. У “Белгина”га қарши учрашувда хет-трикка эришиб, “Шахтёр”нинг 5:1 ҳисобидаги ғалабасига катта ҳисса қўшди. Шундан кейин Яхшибоев sports.uz мухбири билан мулоқотга киришди. 

- Ҳар доим легионер сифатида кўрсатаётган ўйинларингиз ва натижаларингиз барчамизнинг эътиборимизни тортмоқда ва хурсанд қиляпти. Аввало, охирги турда учта гол урганингиз ҳамда жамоангизнинг йирик ҳисобдаги ғалабаси ҳақидаги фикрларингиз билан ўртоқлашсангиз...

- Бу ўйинни ютишимиз шарт эди. Бизнинг ҳар бир учрашувимиз чемпионлик учун кетмоқда. Киритган голларимга тўхталадиган бўлсам, айни чоғда тўпурарлар пойгасида кураш олиб боряпман. Мендан олдинда эса, БАТЭ ҳужумчиси 17 та гол билан пешқадамлик қиляпти. Ушбу ўйингача ҳисобимда 13 та гол бор эди, энди 16 та бўлди. Ушбу беллашувда гол уришим шарт эди. Албатта, учта гол демайман-у, барибир гол урмасам бўлмасди. Худога шукр, хет-трикка эришдим ва БАТЭ ҳужумчисига яқинлашиб қолдим. Ниятим кейинги ўйинларда ҳам яна голлар уриб тўпурарлар пойгасида олдинга чиқиб олмоқчиман.

- “Шахтёр”нинг ҳар бир учрашувидан кейин бош мураббий Роман Григорчукнинг матбуот анжуманларида айтадиган фикрларига қизиқамиз. Яъни, сиз ҳақингизда қандай гаплар айтаркин, дея кузатиб борамиз. Бу сафар йирик ҳисобдаги ғалабадан сўнг, Яхшибоев ҳали ўзининг тўлиқ имкониятларини ишга солгани йўқ, деган гапларни айтди. Умуман олганда, ўзингиз ҳам унинг матбуот анжуманларидаги фикрларини ўқиб борасизми? Григорчукнинг гапига муносабатингиз қандай? Ростдан ҳам ҳали тўлиқ имкониятимни ишга сола олганим йўқ, деб ўйлайсизми?

- Тўғри, ҳар учрашувдан кейин мураббийларнинг интервьюларини кузатиб бораман. У ўз иқтидорини ҳали 100 фоизга оча олмади, деган фикрига келсак, агар бу тўғри десам ўзимни мақташ бўлиб қолади. Билмадим, бу саволингизга жавоб беришим қийин. Барибир мураббий футболчидаги иқтидорни кўра олади. Балки у ўша иқтидорни кўра олгани учун ҳам шу фикрларни билдиргандир. Яна аниғини билмадим.

- Беларусь чемпионатига кўчиб ўтганингиздан сўнг, сиздаги янги қобилятларни кўряпмиз. Бир сўз билан айтганда, ўзимиз учун янги Яхшибоевни кашф қилмоқдамиз. Ўзбекистон чемпионатида эса сиздаги бундай сермаҳсулликни сира билмасдик. Тўғри, легионер сифатида ўйнаб ўзини кўрсатиши қийин. Бироқ у ерда қандай қилиб бор маҳоратингизни намойиш эта оляпсиз?

- Яхши савол бўлди. Ўзбекистон чемпионатида ўйнаганимда очиқчасига айтсам, ҳар қандай футболчи учун мураббийнинг ишончи керак. Агар мураббий сизга ишонч билдирмаса, минг ҳаракат қилганингиз билан ўйинингизга таъсир қилади. Тўғрисини айтаман, ўзимизнинг чемпионатда менга ишонч билдирилмаган. Бу ерда эса ҳаммаси бошқача, менга мураббийлар ишонишади. Мени худди етакчидек ҳисоблашади. Шунинг учун ҳам мен ҳар бир учрашувда ўша ишончни оқлаш мақсадида бор кучим билан ўйнайман. Доим голлар уриб, жамоамга ёрдам беришга ҳаракат қилиб келяпман. Ҳар қандай ҳолатда ҳам барибир биринчи навбатда футболчи учун мураббийнинг ишончи ва қўллаб-қувватлаши муҳим бўлиб қолаверади. Бусиз бўлмайди.

- “Пахтакор”да ҳам ўз даражангизни кўрсатишингизни кутгандик. Илгари берган интервьюларингизда Шота Арвеладзенинг сизга ишонч билдирмагани ҳақида айтгандингиз. Балки Беларусь чемпионатида ўзингизни кўрсатаётганингиз унга нималарга қодирлигингизни исботлаш борасидаги кучли иштиёқингиз ҳам сабаб бўлаётгандир?

- Шота Арвеладзе жуда яхши инсон. Уни ҳурмат қиламан. Билмадим, “Пахтакор”да таркиб кучлилигиданми ёки футболчилар кўплигиданми, менга қанақадир...Инкор этмайман, ишонч ҳам билдирган, балки ўзим оқлай олмагандирман. Ёки менга охиригача ишонч билдирмагандир. Бу вазиятда биргина Арвеладзени айбдор қилиб кўрсатишим ҳам нотўғри. Бир томондан қараганда, бу саволингиз ҳам тўғри. Бу нарса ҳам менга ўйинларда ўзимни кўрсатишим кераклиги борасида ҳамда жамоамга фойда келтира олишимни исботлашга ҳаракат қилаётганимда ҳам ёрдам беради, буни тан оламан.

- Энди барчани кейинги фаолиятингиз қандай тус олиши қизиқтиряпти. Чунки сизни янада кучлироқ чемпионатларда тўп суришингизни хоҳлаяпмиз. Бу борада аниқ таклифларга эгамисиз?

- Таклифлар бор, икки-учта. Лекин қайси давлатдан, қайси жамоадан эканлиги ҳақида сизга очиқчасига айта олмайман. Худо хоҳласа, мавсум тугашига бир ойча қолди. Шундан кейин ҳаммаси ойдинлашади.

- “Шахтёр” билан келаси йили Еврокубокларда иштирок этиш ниятингиз борми? Ёки шу мавсум тугагач, у ердан аниқ кетасизми?

- Ҳозирги мақсадимиз чемпионатда 1-ўринни қўлга киритиш. Нима десам экан, менинг “Шахтёр” билан шартномам декабрнинг охирида тугайди. Худо хоҳласа, “Шахтёр”да қолмоқчи эмасман. Ҳозир олдимда 2-3 та таклифлар турибди. Шуларни ўрганиб чиқяпмиз ва қишда бир тўхтамга келамиз.

- Ўзбек футболчиларининг яна Беларусь чемпионатига жойлашишига сиз ҳам қандайдир ёрдамлашишингиз мумкинми? Бу борада уларнинг ҳам яна бошқа ҳамюртларимизга қизиқишлари борми?

- Жойлаштира олмайман. Лекин мендан бўладиган ёрдам шуки, ўз ўйинларим орқали яхши жиҳатларимни кўрсатсам, ўзбек футболчиларига қизиқишлар янада кўпаяди. Мана, ҳозирнинг ўзида бу ерда уч нафар ўзбекистонлик ўйинчи ўйнамоқда. Яна ҳамюртларимиз кўпаяди, деган умиддаман.

- Яқин орада “Шахтёр” БАТЭга қарши майдонга тушади. Бу чемпионлик йўлидаги жиддий кураш, қолаверса, тўпурарлар ўртасида ҳам ўзига хос тўқнашувга айланади. Ўша ўйин чемпионлик масаласини ҳал қиладими?

- Ҳа, бизни БАТЭ билан чемпионлик ўйини кутиб турибди. Бу 80 фоиз чемпионликни ҳал қиладиган ўйин. Бундан ташқари, ўша учрашувда тўпурарлар пойгасида пешқадамлик қилаётган ҳужумчи билан ҳам тўқнаш келаман. Ҳали яна учта ўйин бор. Тўпурар бўлиш учун иккаламизда ҳам катта имконият бор. Лекин боя айтганимдек, чемпионлик масаласида 80 фоизга ҳал қилиб беради.

- Жасур Яхшибоевнинг асосий орзуси нима?

- Асосий мақсадим – кучли бешлик чемпионатларидан бирида тўп суриш. Бунга босқичма-босқич эришаман, деган умиддаман ва шу мақсад бўйича ҳаракат қиляпман.

- Беларусь билан Ўзбекистон чемпионатини солиштира оласизми? Фарқ нималардан иборат?

- Иккала чемпионатни солиштириш ҳақидаги саволга аниқ жавоб бера олмайман. Чунки бу қийин савол.

- Миллий терма жамоага келганда ўзингизни янада кучлироқ сифатида ҳис қиляпсизми?

- Терма жамоага чақиришлари ҳамма футболчи учун ёқимли. Албатта, мени ҳам таклиф қилишаётганидан хурсандман. Мураббийлар менга ишонч билдириб чақиришяпти ва бу ишончларни оқлашга ҳаракат қиламан.