Мбаппе катта рекордларни янгилай бошлади

Франция терма жамоаси ҳужумчиси Килиан Мбаппе жаҳон чемпионатлари плей-офф босқичларида урилган голлар сони бўйича ўз шахсий рекордини янгилади. У Парагвайга қарши мундиал 1/8 финал баҳсининг 70-дақиқасида пенальтидан аниқ зарба йўллаб, ўйиндаги ягона гол муаллифига айланди (1:0). 

Учрашув АҚШнинг Пенсильвания штати, Филадельфия шаҳрида жойлашган «Линкольн Файненшел Филд» стадионида бўлиб ўтди. Беллашувга ўзбекистонлик ҳакам Ильгиз Танташев бош ҳакам сифатида хизмат қилди.

Парагвай дарвозасига киритилган ушбу гол Мбаппе учун жаҳон чемпионатлари плей-офф босқичларидаги 11-гол бўлди. 2026 йилги жаҳон чемпионатига қадар бу кўрсаткич бўйича рекорд бразилиялик афсоналар Леонидас (5 ўйинда 8 гол) ва Роналдо (10 ўйинда 8 гол)га тегишли эди.

Мбаппе уларнинг ютуғини аллақачон 1/16 финалдаёқ ортда қолдирганди — ўша баҳсда у Швеция дарвозасига икки бор гол урган ва французларга йирик ҳисобдаги ғалабани таъминлаган эди (3:0).