Мбаппе Месси рекордини синдирди

Мадриднинг «Реал» жамоаси форварди, француз юлдузи Килиан Мбаппе УЕФА Чемпионлар Лигасида Лионель Мессига тегишли бўлган ёш бўйича рекордни янгилади. 

Италиянинг «Рома» жамоасига қарши сафар учрашуви Мбаппе учун Чемпионлар Лигаси асосий босқичидаги юзинчи ўйин бўлди. 2026/2027 йилги мавсумнинг умумий босқичи иккинчи турида ўтказилган беллашувда мадридликлар драматик тарзда 4:3 ҳисобида ғалаба қозонди.

Мбаппе ушбу кўрсаткичга 27 ёш ва 298 кунлик пайтида етиб, мусобақа тарихида 100 та ўйин ўтказган энг ёш футболчига айланди. Илгари бу рекорд Лионель Мессига тегишли эди — у Чемпионлар Лигасидаги юзинчи ўйинини 28 ёш ва 84 кунлик чоғида ўтказган.

Қизиғи шундаки, аргентиналик супер юлдуз ўз рекордини 2015 йил сентябрида айнан шу «Рома»га қарши, Римдаги «Олимпико» стадионида бўлиб ўтган сафар учрашувида ўрнатган эди.

Килиан Мбаппе Чемпионлар Лигасида дебютини 2016 йил сентябрида «Монако» таркибида амалга оширган. Кейинчалик у мусобақада «ПСЖ» шарафини ҳимоя қилди, 2024 йилдан эса мадриднинг «Реал» клуби сафида майдонга тушмоқда.