Мбаппе "Реал" афсонасининг рекордини янгилади

Мадриднинг "Реал" клуби ҳужумчиси Килиан Мбаппе Испания Ла Лигасининг 36-тури доирасида "Мальорка"га қарши ўйинда (2:1) гол урди. Бу гол француз футболчиси учун Ла Лигадаги дебют мавсумида 32 ўйинда урилган 28-гол бўлди. Шу тариқа, Мбаппе "Қироллик клуби"нинг собиқ ҳужумчиси Алфредо Ди Стефанонинг рекордини янгилади. Бу ҳақда OptaJose'нинг ижтимоий тармоқдаги саҳифаси хабар берди.

1953/1954-йилги мавсумда Аргентина, Колумбия ва Испания терма жамоаларида ўйнаган Ди Стефано "Реал" сафидаги дебют мавсумида Испания чемпионатининг олий дивизионида 27 та гол урган эди.

Умумий олганда, Мбаппе "Қироллик клуби" сафида 53 та ўйинда майдонга тушиб, 39 та гол ва 4 та голли узатмага муаллифлик қилган. Ди Стефано эса, "Реал" сафида 396 та ўйинда 308 та гол урган.