Мени "Барса"га қўйиб юборинг!

«Атлетико» ҳужумчиси Хулиан Альварес «Барселона»га ўтиш масаласини яна бир бор фаоллаштириш ниятида.

Sport.es нашрининг ёзишича, аргентиналик футболчи аллақачон каталонияликлар спорт директори Декуни ўз режалари билан таништирган. Хабарга кўра, Альварес «Атлетико» раҳбариятига босимни кучайтиришга тайёр, бироқ буни кескин шаклда амалга оширишни истамайди: у машғулотларни бойкот қилиш ёки клуб билан очиқ можарога боришни режалаштирмаяпти. 

Яқин кунларда у шахсан раҳбарият билан учрашиб, ёзда жамоани тарк этиш истагини билдириши кутилмоқда.

Аввалроқ «Барселона» форвард учун 100 миллион евро таклиф қилган, аммо «Атлетико» бу суммани қабул қилмай, музокара бошлашдан бош тортган эди. Манба маълумотича, агар мадридликлар ўз позициясини қайта кўриб чиқса, каталонияликлар таклифни яна оширишга тайёр.

Альварес «Атлетико» сафини 2024 йил ёзида тўлдирган. Унинг амалдаги шартномаси 2030 йилгача мўлжалланган, футболчининг бозор қиймати эса тахминан 120 миллион евро атрофида баҳоланмоқда.