Месси "Барса"га бир тайм ўйнаб беради

«Барселона» мухлислар қалбини жумбушга келтирди. «Барселона» раҳбарияти клуб тарихидаги энг катта рамзий шахслардан бири – Лионель Мессига алоҳида шарафлаш маросими уюштиришни режалаштирмоқда. 

Бу тадбир «Камп Ноу» стадиони реконструкцияси тўлиқ якунлангандан кейин ўтказилиши кутилмоқда.

Клуб президенти Жоан Лапортага кўра, каталонияликлар аргентиналик афсона иштирокида махсус маросим тайёрламоқда. Унинг таъкидлашича, Месси «Барселона» тарихида ўчмас из қолдирган ва клуб буни муносиб тарзда нишонлашни истайди.

Эслатиб ўтамиз, Лионель Месси 2021 йил ёзида «Барселона»ни тарк этган эди. Лапорта сўзларига кўра, у учун мўлжалланаётган расмий тадбир стадион реконструкцияси тўлиқ якунлангачгина амалга оширилади.

Испания нашри El Nacional маълумотича, «Камп Ноу»нинг тўлиқ қайта қурилиши 2028 йил бошларига қадар тугатилиши режалаштирилган.

Аввалроқ оммавий ахборот воситаларида «Барселона» ва «Интер Майами» ўртасида Жоан Гампер кубоги доирасида ўйин ўтказиш эҳтимоли ҳақида хабарлар тарқалган эди. Шу сценарийга кўра, Месси ҳар икки жамоа сафида ҳам бир бўлимдан майдонга тушиши мумкинлиги айтилган.

Шу билан бирга, ҳозирча бундай ўйинни ташкил этиш бўйича клублар ўртасида расман тасдиқланган музокаралар мавжуд эмас. «Барселона» томонидан эса асосий эътибор стадион қурилиши якунлангач, Месси учун муносиб ва йирик тадбир уюштириш режасига қаратилган.