Месси Марадонадан анча ўзиб кетди

Лионель Месси жаҳон чемпионатлари тарихида голли узатмалар сони бўйича ўзининг ўзига тегишли рекордини янгилади.

Аргентина терма жамоаси етакчиси 2026 йилги жаҳон чемпионати ярим финалида икки бор голли узатма муаллифига айланди. Энди унинг жаҳон чемпионатлари ҳисобидаги голли узатмалари сони 12 тага етди. 

Шу тариқа Месси ушбу кўрсаткич бўйича 8 та голли узатмага эга бўлган ватандоши Диего Марадонадан анча узоқлашди.

39 ёшли Месси 2023 йилдан буён Шимолий Америкадаги етакчи футбол лигаси — МЛСда иштирок этувчи "Интер Майами" клуби шарафини ҳимоя қилмоқда. У Европа футболида "Пари Сен-Жермен" ва "Барселона" таркибида тўп сурган. "Барселона" билан бирга тўрт марта Чемпионлар лигасида, уч мартадан УЕФА Суперкубоги ва клублар ўртасидаги жаҳон чемпионатида ғолиб чиққан.

Месси 2022 йилги жаҳон чемпиони, 2014 йилги жаҳон чемпионати финалчиси, 2008 йилги Олимпиада чемпиони ҳисобланади. Шунингдек, у 2021 ва 2024 йилларда Америка Кубогини қўлга киритган. Афсонавий ҳужумчи 8 марта "Олтин тўп" совринини қўлга киритган ягона футболчи сифатида ҳам рекордчи ҳисобланади.

Жаҳон чемпионати АҚШ, Канада ва Мексика ҳудудида ўтказилмоқда. Мусобақа 19 июль куни Аргентина ва Испания терма жамоалари иштирокидаги финал билан ниҳоясига етади.