Месси ва Роналду катта турнирда бир жамоада тўп тепиши мумкин

Лионель Месси ва Криштиану Роналду келаси ёзда бир жамоада ўйнашлари мумкин. Бу ҳақда "Goal" нашри хабар бермоқда.

Ҳозирда Роналду Саудия Арабистонининг "Ан-Наср" жамоасида тўп тепмоқда, бу жамоа эса яқинлашиб келаётган клублар ўртасидаги жаҳон чемпионатида иштирок этмайди.

Унинг янги шартномаси ҳали келишилмаганлиги сабабли, португалиялик футболчи ушбу турнирда қатнашиш учун "Интер Майами" билан қисқа муддатли шартнома имзолаши мумкин. Манбанинг маълум қилишича, Месси ва Роналду Америка клубининг ҳужумкор жуфтлигини ташкил этишга тайёр. Бироқ, ҳозирча трансфер масаласи ҳал этилмаган.

Маълумот учун, сайёрамизнинг энг кучли 32 та клуби иштирок этадиган мусобақа 15 июндан 13 июлгача АҚШда бўлиб ўтади.