ПФЛ томонидан Суперлиганинг қачондан давом эттирилиши расман эълон қилинди ва шунга кўра клублар ҳам машғулотларни бошлаб юборди. Бекободнинг “Металлург” клуби ҳам бошқалар қатори чемпионат баҳсларига ҳозирлик кўрмоқда. Ушбу жамоа бунга қадар ўтказилган учта ўйинда биттадан ғалаба, дуранг ҳамда мағлубият қайд этиб ҳозирча ҳисобига тўрт очко ёздириб қўйган.

“Металлург” устози Андрей Шипилов эса имкон қадар қўл остидаги футболчиларни навбатдаги учрашувга яхшироқ тайёрлашга ҳаракат қилмоқда. Айни вақтда бор эътиборини асосан машғулотларга қаратган Андрей Шипилов Sports.uz сайти учун қисқача интервью берди.  

-  Андрей Сергеевич, ПФЛ томонидан чемпионат ўйинларини ўтказишга рухсат берди. Жамоангиз қандай режалар асосида шуғулланмоқда?

-  Биз 25 майдан аста-секин машғулотларга киришгандик. Дастлабки ҳафтада 40-45 дақиқадан шуғулландик. Барча футболчиларимизнинг вазни жойида. Биз уларни карантин эълон қилинган пайтда огоҳлантиргандик. Ўтган вақт давомида эса жисмоний тайёргарлик бўйича мураббий улар билан астойдил ишлади.

-  Айтиш мумкинки, уч ой футболсиз қолиб кетдик ва бу катта танаффус. Сизнингча, Суперлигага киришишдан аввал машғулотлар қанча муддат давом этгани маъқул? Аниқроғи, қўл остингиздаги йигитларнинг ўйин ритмига эга бўлиб олишлари борасида сизни хавотирга солмаяптими?

-  Албатта, 70 кундан кўп вақт футболчиларнинг ўйин амалиётисиз қолиб кетиши хавотирга солмасдан қўймайди. Фақат охирги кунларда ўйинчилар ҳар тайми 25 дақиқадан иборат ўзаро назорат учрашуви ўтказдилар холос. Умуман олганда, 15 июндан сўнг ФИФА кунларисиз ҳар 5-6 кунда ўйин ўтказиш мумкин.

-   Жамоангиз 4-турга қанчалик тайёр бўлади?

-  Бу саволга 15 июндан кейин жавоб бераман.

 

Матнда хатолик топсангиз, ўша хатони белгилаб, бизга жўнатинг (Ctrl + Enter)