«Monako» Lukakuni sotib olishga qiziqmoqda

«Napoli» klubi hujumchisi Romelu Lukaku faoliyatini Fransiya chempionatida davom ettirishi mumkin. Foot Mercato nashri maʼlumoticha, 33 yoshli belgilaylik forvardga «Monako» jamoasi jiddiy qiziqish bildirgan.

Maʼlum qilinishicha, tarkibni tark etishi kutilgan Folarin Balogun oʻrniga hujum chizigʻini kuchaytirishni rejalashtirayotgan «Monako» allaqachon Lukaku transferi boʻyicha dastlabki maʼlumotlarni soʻrab murojaat qilgan. «Napoli» belgilaylik futbolchini taxminan 10 million yevro atrofidagi summa evaziga qoʻyib yuborishga tayyor. Italyan klubi bir qator yangi futbolchilarni olish uchun Lukakuni sotishga muhtoj ekani taʼkidlanmoqda. Uning oʻrnini bosishi mumkin boʻlgan asosiy nomzodlardan biri sifatida «Arsenal» hujumchisi Gabriel Jezus koʻrsatilmoqda.

Lukaku oʻtgan mavsumda jarohatlar sabab 196 kun davomida shifoxona roʻyxatida qoldi va turli musobaqalarda jami 34 ta uchrashuvni oʻtkazib yubordi. Natijada u butun mavsum davomida bor-yoʻgʻi 7 ta oʻyinda maydonga tushdi, jami 64 daqiqa oʻynab, 1 ta gol urdi, xolos.

Salomatlik muammolaridan tashqari, «Napoli» rahbariyati futbolchining oʻzini tutishiga ham norozilik bildirgan. Klub uchun «soʻnggi tomchi» mart oyidagi voqea boʻldi: Lukaku jarohat sabab Belgiya terma jamoasi yigʻinlarini tark etgach, neapolliklar talabiga qaramay klub ixtiyoriga qaytishdan bosh tortdi va tiklanish jarayonini vataniida davom ettirishni afzal koʻrdi.