Моуриньо «Челси»да Шевченкани кўришни истамагани айтди

Лондоннинг машҳур «Челси» клуби собиқ бош мураббийи Жозе Моуринью 2006 йилда украиналик ҳужумчи Андрей Шевченконинг жамоага келишига қарши бўлганини маълум қилди, дея хабар беради Sports.kz.

«Шева» ўша пайт учун рекорд ҳисобланган — 30 миллион фунтдан ортиқ тўлов эвазига «Челси» сафига қўшилган эди. Аммо «Стэмфорд Бридж»да у кутилган даражада ўйин кўрсата олмади: жароҳатлар уни тез-тез майдондан четлатди. Натижада, у «зангорлар» таркибидаги 48 ўйинда бор-йўғи тўққизта гол урди.

«Абрамовичда футболга нисбатан беқиёс иштиёқ бор эди, лекин у вазиятнинг ичидан яхши хабардор эмасди. Шевченко рўйхатда босс билан алоқалари, агентлар таъсири туфайли пайдо бўлган, мен эса уни жамоага олишни ҳеч қачон истамаганман. Лекин бу ҳақда ҳеч кимга айтмаганман, шу боис бу ерда менинг ҳам масъулиятим бор. Биласизми, мен кимни олишни хоҳлаганман? Самюэль Это’о», — дея Моуриньюнинг сўзларини келтиради BBC.

Эслатиб ўтамиз, Жозе Моуринью «Челси»ни 2004 йилдан 2007 йилгача бошқарган. У клуб эгасига айланган Роман Абрамович билан юзага келган бир қатор келишмовчиликлардан сўнг бош мураббийлик лавозимини тарк этган эди.