Моуриньо “Барса” трансферини блоклади

Испаниянинг амалдаги  чемпиони “Барселона” таркибини тажрибали футболчи билан кучайтириш мақсадида Португалия чемпионатида “Бенфика” шарафини ҳимоя қилиб келаётган Николас Отамендини нишонга олган эди.

Mundo Deportivo нашри маълумотларига кўра, каталонияликлар 37 ёшли аргентиналик футболчини қишки трансфер ойнасида ўз жамоасига қўшиб олиш вариантини кўриб чиқмоқда. Аммо манбанинг таъкидлашича, бу иш “Барселона” учун осон бўлмайди.

Гап шундаки, Лиссабон жамоасини бошқараётган Жозе Моуриньо таркибдаги етакчи ўйинчилардан ҳисобланган Отамендини қўйиб юбормоқчи эмас. Машҳур мураббий клуб раҳбариятидан бу ўйинчи билан янги шартнома имзолаш жараёнини тезлаштириш ва имкон қадар қисқа фурсатда якунлашни талаб қилган.

Моуриньонинг бу талаби Отамендининг Каталонияга кўчиб ўтишининг олдини олиш мақсадида илгари сурилмоқда.

Николас Отаменди 2020 йилда “Манчестер Сити”дан “Бенфика”га 15 миллион евро эвазига кўчиб ўтган эди. Унинг Португалия клуби билан амалдаги шартномаси 2026 йил 30 июнига қадар амал қилади. Жорий мавсумда ҳимоячи 32 та ўйинда майдонга тушиб, 3 та гол урди ва 4 та голли узатмани амалга оширди.