Моуриньо: Менга "Реал"ни мақтаманг

Мадриднинг «Реал» жамоаси бош мураббийи Жозе Моуринью ҳозирги таркибни ўзининг олдинги, совринлар қўлга киритган жамоалари билан таққослашдан бош тортди.

«Ҳеч қандай таққослаш бўлиши мумкин эмас. Бу жамоа, шубҳасиз, жуда катта салоҳиятга эга, лекин ҳали ҳеч нарса ютгани йўқ, ҳаммаси энди бошланяпти. Келажакда нима бўлишини кутамиз. Фақат шуни айта оламанки, мен таркибдан ва ихтиёримдаги футболчилардан жуда мамнунман», – дея Моуриньонинг сўзларини AS нашри келтиради.

Португалиялик мураббий илгари «Порту» ва «Интер» билан Европа чемпионлар лигасида ғолиб чиққан, шунингдек, «Челси» билан Англия чемпиони бўлган.

«Реал»даги илк фаолияти даврида эса Моуриньо мадридликларни 2011/12 мавсумида Испания чемпионига айлантирган эди.