Озарбайжон пойтахтида дзюдо бўйича "Катта дубулға" туркумига кирувчи йирик мусобақанинг биринчи кун беллашувлари давом этмоқда. Бироз айни пайтга келиб барча вазн тоифасида иккинчи давра беллашувлари бўлиб ўтмоқда. 

Бироз аввал ушбу босқич доирасида ҳамюртимиз Муҳриддин Тиловов (-66 кг) белгиялик Кеннет ван Гансбеке билан беллашди. Қўшимча вақтгача чўзилган беллашув Тилововнинг ғалабаси билан якунланди ва дзюдочимиз учинчи даврага йўл олди. 

Унинг бу босқичдаги рақиби исроиллик Барух Шмаилов бўлади. Юртдошимиз бу рақибининг ҳам тўсиғидан ўта олса, чорак финал иштирокчисига айланади. Эслатиб ўтамиз, Тиловов дастлабки босқичда қатарлик Айюб Ал Адриссини мусобақадан чиқариб юборган эди.