"Барса" юлдузини тиғ остига жўнатмоқчи, ўйинчи норози

«Барселона»да Френки де Йонг атрофидаги вазият клуб раҳбарияти ва мураббийлар штабини жиддий ўйлантира бошлади, деб хабар бермоқда Diario Sport.

Ҳужумкор яримҳимоячи тиззасида олган жароҳати сабаб ҳали ҳам соғлиғи билан боғлиқ муаммоларни бошдан кечирмоқда. Шунга қарамай, у ҳануз жарроҳлик амалиётига рози эмас. Клуб эса айнан шу позициядан норози.

«Барса» врачлари ва мутахассислари фикрича, консерватив усулда даволаш энди кутилган самарани бермаяпти. Де Йонг жаҳон чемпионатида иштирокини якунлаганига олти ҳафтадан кўпроқ вақт ўтди, аммо шунга қарамасдан, у операцияга розилик билдирмаяпти, холбуки, тикланиш жараёни қониқарли эмас.

Манбаларга кўра, футболчининг бу қарорлари клуб ичида анча вақтдан бери норозилик уйғотиб келмоқда. «Барселона»да де Йонгнинг қиш охиридан бери барча жисмоний тайёргарлиги, асосан, жаҳон чемпионатига етук ҳолатда бориш истагига боғлиқ бўлган, деган фикр шаклланган.

Нидерландия терма жамоаси таркибида у жамоа мусобақани 30 июнда тарк этгунча ҳар бир ўйинни асосий таркибда бошлади. Кейинчалик де Йонг тушунтиришича, терма жамоа шифокорлари унинг жароҳати даражасини етарлича баҳоламаган, ўзи эса янада оғир жароҳат олиш хавфи йўқ, деб ўйлаб, майдонга тушишда давом этганини айтган. «Барселона»да эса бу вазиятга бундай ёндашув юзасидан шубҳалар сақланиб қолган.

Жаҳон чемпионатидан сўнг яримҳимоячи учун тахминан тўрт ҳафталик консерватив тикланиш режаси тузилган, шундан кейин операция зарурлиги қайта баҳоланиши керак эди. Аммо айнан шу масала клуб ва футболчи ўртасидаги асосий келишмовчиликка айланган.

Де Йонгнинг фикрича, ушбу тўрт ҳафта унинг тўлиқ машғулотларга қайтган кунидан бошлаб ҳисобланиши керак. Клуб эса у машғулотларга қайтишидан олдин ҳам деярли худди шу турдаги реабилитация ишларини бажарган, деб ҳисоблайди ва шу боис вақтни яна бошидан санашга ҳеч қандай асос кўрмаяпти. «Барса»нинг тиббий ва спорт соҳасидаги мутахассислари консерватив даволаш учун ажратилган муддат аллақачон ортиқча чўзилиб кетган, деб ҳисоблайди. Энг катта муаммо шундаки, шунча вақт ўтганига қарамай, кутилган яхшиланиш кузатилмади.

Шу сабаб клуб позицияси аниқ: муаммога радикал нуқта қўйиш ва тикланишни аниқроқ муддатлар билан режалаштириш учун де Йонг операция қилдириши керак. Бироқ футболчининг ўзи ҳали ҳам жарроҳликка рози эмас ва консерватив даволашни яна давом эттириш тарафдори.

Бу қарорнинг спорт ва маъмурий жиҳатдан ҳам оқибатлари бор. Агар операция сабаб де Йонг узоқ муддатга майдондан четда қолса, «Барселона» қоидалар доирасидаги имкониятлардан фойдаланиб, рўйхатда бўш жой очиш ва унинг бир қисмини бошқа футболчи учун ишлатиш имкониятига эга бўлади. Шу билан бирга, клуб де Йонгнинг терма жамоа сафида олган жароҳати учун ФИФАдан тегишли компенсация олиши мумкин.