Неймар ҳақида нохуш хабар тарқалди

Бразилия футболининг энг машҳур ўйинчиларидан ҳисобланган Неймар оғир даврларни бошдан ўтказмоқда. 33 ёшли футболчи 2026 йилги жаҳон чемпионатигача юқори спорт формасига чиқиб олишни мўлжаллаган.

Кейинги мавсумдаги жароҳатлар туфайли Неймарнинг ўйинида пасайиш кузатилмоқда. Ҳатто Бразилия терма жамоасининг янги бош мураббийи Карло Анчелотти ҳам унга спорт формасини тиклаб олиш учун вақт берди.

Бироқ Неймар яна маълум муддат футболдан узоқлашади. “Сантос” клуб ўз ўйинчиси карантинга олингани эълон қилди.  

- Вирус инфекцияси тарқалгани муносабати билан “Сантос” тиббиёт хизмати Неймарни кўрикдан ўтказди. Лаборатория текширувлари футболчи COVID-19 коронавирусини юқтириб олганини аниқлади. Аслида футболчи касаллик аломатлари намоён бўлган пайтдаёқ карантинга олинган эди.

Айни пайтда Неймар ўз уйида ҳордиқ чиқаряпти ва шифокорлар берган тавсиялар бўйича даволанмоқда, - дейилади “Сантос” клуби баёнотида.

Неймар йил бошида “Сантосга кўчиб ўтганидан бери барча турнирларда атиги 14  маротаба майдонга тушиб, ўз ҳисобига учтадан гол ва ассист расмийлаштирди.