Норвегия Трамп устидан шикоят киритади

Норвегия Футбол ассоциацияси АҚШ президенти Дональд Трампнинг ФИФА ишларига аралашуви юзасидан халқаро ташкилотнинг этика қўмитасига расмий шикоят киритишга тайёрланмоқда. 

Бу ҳақда The Times нашри журналисти Мартин Зиглер хабар берди.

Гап АҚШ терма жамоаси ҳужумчиси Флориан Балогун билан боғлиқ вазият ҳақида кетмоқда. У Босния ва Герцеговинага қарши 1/16 финал баҳсида (2:0) майдондан четлатилган эди. Кейинчалик Балогунга берилган дисквалификация бир йиллик синов муддати билан тўхтатиб турилди ва натижада у Бельгияга қарши 1/8 финал учрашувида (1:4) майдонга тушди.

Шундан сўнг Дональд Трамп ушбу жараёнга шахсан аралашганини очиқ тан олди.

Турли оммавий ахборот воситалари тарқатган маълумотларга кўра, АҚШ президенти ФИФА раҳбари Жанни Инфантино билан суҳбатда Балогуннинг майдондан четлатилишини бекор қилишга ишонтиргани айтилмоқда.