Олег Зотеев: "Ҳеч қаерга кетмайман"

Тошкентнинг “Локомотив”  клуби про лига мусобақасида карвонбошилик қилаётганини билсангиз керак.

Таркибида тажрибали футболчиларни жамлай олган “Локо”нинг мусобақа пешқадами сифатида қайд этилиши кутилганди. Ҳозирча “Темирйўлчилар” тахминларни оқлаяпти.

Биринчи даврадан сўнг якка пешқадам бўлиб турибди. Жамоа сардори Олег Зотеев бу йил “Локомотив”га қайтди ва жамоани Суперлигага йўлланма олишида ўз ҳиссасини қўшмоқчи ва буни амалда ҳам бажаряпти.  Ушбу ўйинчи биринчи даврадан кейинги таассуротлари хусусида гапирди.

“1-поғонада бўлишимизга ишонгандим”

- Ҳа, биринчи даврани 1-ўринда тугатдик. Мағлубиятсиз кетяпмиз ва 2 та дуранггимиз бор. Лекин ортимизда келаётган “Динамо”да ҳам мағлубият йўқ. “Қўқон-1912”да эса фақат 1 та мағлубият бор. Менимча, чемпионат қизиқарли кечяпти. Сизга мавсум бошида айтгандим, барибир қийин бўлади. Про лига ҳам бугунги кунда осон чемпионат эмас. Лекин биринчи даврани камида юқори иккиталикда тугатишимизни кутганман. Айнан 1-поғонада бўлишимизга ишонганман. Тўғри, қандай кутган бўлсам шундай тугатдик. Ростини айтсам, биринчи даврада 9 та ютиб, 1 та дуранг ўйнаймиз, деб ўйлагандим. 2 та дуранг бўлиб қолди, майли ҳеч нарса эмас. Менимча, иккинчи давра бундан ҳам қизиқарли ўтади. Ҳамма жамоа бир-бирини билиб олди. Бир қатор жамоалар трансферлар ҳам қилади. Шу боис иккинчи давра биринчи даврадан ҳам кўра қийинроқ кечади. Ҳали ҳамма нарса олдинда.

“Катта қийинчиликлар бўлмади”

- Ростини айтсам, қийналмадим. Ҳа, бир-иккита учрашувда майдонлар чатоқ бўлгани учун бироз қийинчиликларга учрадик. Унда ҳам техник тарафдан муаммоларга дуч келдик. Тўп сакраб кетади ёки майдонларга сув сепилмаган бўлади. Лекин умумий маънода айтсам, катта қийинчиликлар бўлмади.

“Ҳозирча биз яқинроқ турибмиз”

- Биз билан қайси жамоа чиқади? Бунга жавоб беришим қийин. Ўйлашимча, ҳали 3 та жамоада яхши имкониятлар сақланиб турибди. Ҳозирча ҳеч ким Суперлига учун 100 фоиз имкониятни қўлга киритгани йўқ. Бу масалада аниқ гап айта олмайман. Ким чиқишини билмайман. Тўғри, ҳозирча биз яқинроқ турибмиз. Лекин бу ҳали 100 фоизли натижа эмас.

“Таътилга чиқдик”

- “Локомотив”да қоламан. 3 июлгача таътилга чиқдик. Ҳеч қаерга кетмайман. Ҳа, Суперлиганинг бир-иккита жамоаси қизиқиш билдиряпти. Аммо бормасам керак.

Шуҳратбек Жўраев.