Олимпия чемпионлари изидан...

Қозоғистоннинг Алмати шаҳрида таэквондонинг ВТ йўналиши бўйича “Almaty open - 2024” анъанавий чемпионати давом этмоқда.

Ушбу мусобақада дунёнинг турли мамлакатиларидан келган спортчилар болалар ва катталар ўртасидаги  беллашувларда ғолиблик учун куч синашяпти.

Нуфузли турнирда юртимиз шарафини “Торнадо” клубининг “Муҳаммадзиё” жамоасида таэквондо сир-асрорларини ўрганаётган 35 нафар спортчи ҳимоя қилмоқда. Таэквондочиларни беллашувларга беш  мураббий – Аҳрор Асроров, Абдураҳмон Хўжабеков, Ғофуржон Тошбоев, Зубайр Марифов ҳамда Ирода Ўсарова тайёрлаган.

- Жамоамиз спортчилари “Almaty open” аънавий турнирида мунтазам иштирок этиб келмоқда. Ушбу халқаро турнирда турли ёшдаги кўплаб таэквондочилар қатнашади. Бу беллашувларнинг кескин ва муросасиз ўтишини таъминлайди.

Бундай мусобақаларда спортчиларимиз машғулотларда олган назарий билимлари ва амалий кўникмаларини синовдан ўтказади, маҳорат ва тажрибасини оширади.

“Almaty open-2024” турнирига бу гал ҳам эртароқ келдик ва маҳаллий клублар билан биргаликда машғулот ўтказдик, жамоалар ўртасида ўртоқлик учрашувларини ташкил қилиб, йигит-қизларнинг тайёргарлик даражасини синовдан ўтказиб олдик.

Бу мусобақада  ўтган йили ҳам қатнашиб, шогидларимизнинг аксарияти ғолиб ва совриндорлар қаторидан жой олган эди. Навбатда беллашувларда ҳам юқори натижалар учун курашяпмиз.

Насиб қилса, юртимизга янги чемпионлар билан қайтамиз, - деди “Муҳаммадзиё” жамоаси асосчиси ва мураббийи Аҳрор Асроров.

Эслатиб ўтамиз, “Муҳаммадзиё” жамоаси таэквондочилари яқинда Грузиянинг Батуми шаҳри мезбонлик қилган “Batumi open – 2024” чемпионатида медаллар шодасини қўлга киритган эди.

Таэквондонинг таэквондонинг WT йўналиши Олимпия спорт тури ҳисобланади. Ўзбекистонлик таэквондо усталари бу йил Франция пойтахти Париж шаҳри мезбонлик қилган навбатдаги ёзги  Олимпия ўйинларида биттадан олтин ва кумуш медалга сазовор бўлди.

Улуғбек Рашитов Олимпия ўйинларининг икки карра чемпиони бўлди, Светлана Осипова эса, кумуш медални қўлга киритди.

Бугун юртимизнинг турли ҳудудларида таэквондо сир-асрорларини пухта ўрганиб, халқаро миқёсдаги мусобақаларда қатнаша бошлаган ўғил-қизлар орасидан ҳам яқин келажакда Улуғбек Рашитовдек чемпионлар чиқишига умид қиламиз.