"Олтин тўп" соҳиби вафот этди

 Англия терма жамоасининг собиқ юлдузи, икки карра "Олтин тўп" соҳиби Кевин Киган 75 ёшида вафот этди. Бу ҳақда спортчи оиласининг баёнотига таяниб, Sky телеканали хабар берди.

Кевин Киган жорий йил 1 июнида BBC Sport орқали унга саратон касаллигининг тўртинчи босқичи қўйилганини маълум қилган эди.

- Жуда катта алам ила маълум қиламизки, Кевин Киган 75 ёшида оламдан ўтди. Англия терма жамоасининг собиқ футболчиси ва мураббийи саратонга қарши курашди ва умрининг охирги дақиқаларини рафиқаси ва қизлари бағрида ўтказди. Оила Кевиннинг бутун даволаниш жараёнида ёрдам кўрсатган ажойиб шифокорлар жамоасига миннатдорчилик билдиради, — дейилади марҳум оиласи баёнотида.

Футболчи сифатида Киган Англиянинг "Ливерпуль", "Ньюкасл" ва "Саутгемптон" клубларида, шунингдек, Германиянинг "Гамбург" ва Австралиянинг "Блэкттаун Сити" жамоаларида тўп сурган.

"Ливерпуль" таркибида у уч карра Англия чемпиони, икки карра Англия Суперкубоги ва УЕФА Кубоги совриндорига айланди, шунингдек, бир марта Англия Кубоги ва Европа чемпионлар кубогини қўлга киритган. "Гамбург" билан биргаликда эса Германия чемпионати ва Германия Кубогида ғолиб чиққан.

Киган 1978 ва 1979 йилларда "Олтин тўп" мукофотига сазовор бўлган. У бу совринни икки марта қўлга киритган ягона инглиз футболчиси ҳисобланади. 2022 йилда у Англия футболи Шон-шуҳрат залига киритилган.

Футболчилик фаолиятини якунлагач, Киган мураббийликка ўтди. У "Ньюкасл", "Фулҳэм" ва "Манчестер Сити" клубларига бош мураббийлик қилган, шунингдек, Англия терма жамоасини ҳам бошқарган.