O‘zPFL "Buxoro" klubini ogohlantirdi

Liga buxorolik futbol jonquyarlari va "Buxoro" klubining fidoiy muxlislari uchun o‘tgan mavsumning ikkinchi qismi hamda joriy mavsum boshida Buxoro futbol akademiyasi maydonidagi bir qator muammolarga qaramasdan, viloyatning bosh jamoasi hisoblangan "Buxoro" klubining uy uchrashuvlarini o‘z maydonida o‘tkazishiga ruxsat berib keldi.

Biroq so‘nggi ikki yarim yil mobaynida klub va viloyat futbol mutasaddilari tomonidan taqdim etilgan bir nechta kafolat hatlariga qaramasdan, mazkur stadion holatini yaxshilash yuzasidan amaliy ishlar qilinmadi va bugungi kunga kelib Buxoro futbol akademiyasi maydoni Superliga uchrashuvlarini qabul qila olmaydigan darajaga kelib qolgan.

Superliga reglamentida musobaqa ishtirokchisining uy stadioniga qo‘yilgan bir qator qat’iy talablar mavjud. Jumladan, Reglamentning 4.7-bandida Superliga uchrashuvini o‘tkazuvchi stadion, shu stadionda o‘ynovchi klub yoki mazkur klubga qarashli hududiy futbol assotsiatsiyasi balansida maydonni parvarishlash uchun zarur bo‘lgan texnikalar bo‘lishi zarurligi ko‘rsatib o‘tilgan. Ammo o‘tgan vaqt mobaynida "Buxoro" klubi hamda Buxoro viloyati futbol assotsiatsiyasi mazkur talablarni bajarish yuzasidan kerakli amaliy choralarni ko‘rmadi.

Shundan kelib chiqib, Liga "Buxoro" futbol klubiga uy uchrashuvlarini qabul qiluvchi stadionidagi muammolarni hal qilish va ularni bartaraf etishning imkoni bo‘lmagan taqdirda joriy yilning 25 iyun sanasiga qadar Superliganing 13-turidan o‘rin olgan "Bunyodkor"ga qarshi uy uchrashuvini Superliga uchun ro‘yxatdan o‘tkazilgan qaysi stadionda o‘tkazishi masalasiga aniqllik kiritishi talab etiladi. Superliga reglamentining 14.8-bandidan kelib chiqib, joriy yilning 1 iyul sanasiga qadar mazkur masala yuzasidan "Buxoro" futbol klubi tegishli choralarni amalga oshirmagan taqdirda, 21 iyul sanasidagi o‘yinni avtomatik tarzda raqib jamoa maydoni — "Bunyodkor" stadioniga ko‘chiradi.

Eslatib o‘tamiz, Liga joriy mavsum davomida 3 marta Superliga reglamentining 14.8-bandini ishga tushirishga ulgurdi. Jumladan, 3-tur doirasida "Mash’al", 4-turda "So‘g‘diyona" hamda 7-turda "Nasaf" stadion bilan bog‘liq muammo sabab raqib maydonida o‘ynashga majbur bo‘ldi.