Почеттино энди АҚШдан кетолмайди

АҚШ футбол федерацияси терма жамоа бош мураббийи Маурисио Почеттино билан шартномани яна тўрт йилга узайтириш бўйича таклиф киритди.

Маълумотларга кўра, АҚШ терма жамоаси раҳбарияти ва Почеттино бир неча ойдан бери ҳамкорликни давом эттириш масаласини муҳокама қилмоқда. Янги шартнома бўйича якуний қарор жаҳон чемпионати якунланганидан сўнг қабул қилиниши кутилмоқда.

Шу билан бирга, Почеттино хизматларига қатор Европа клублар ҳам жиддий қизиқиш билдирмоқда, дея хабар берилди.

Почеттинонинг АҚШ терма жамоаси билан амалдаги шартномаси ҳозир ўтаётган жаҳон чемпионати охиригача мўлжалланган.

Мавжуд келишувга кўра, мутахассис йилига 4 миллион доллар маош оляпти. Агар шартнома узайтирилса, унинг маоши ошиши мумкин ва 54 ёшли мураббий дунёдаги энг кўп маош оладиган устозлар қаторига киради. 

Жаҳон чемпионати гуруҳ босқичида АҚШ терма жамоаси Парагвайни 4:1, Австралияни 2:0 ҳисобида мағлуб этди, Туркияга қарши баҳсда эса 2:3 ҳисобида имкониятни бой берди.

1/16 финалда АҚШ Босния ва Герцеговина терма жамоасига қарши майдонга тушади. Учрашув 2 июл куни бўлиб ўтади.