Погба: Аллегри АПЛда иш топади

Франциялик ярим ҳимоячи Поль Погба "Ювентус"даги собиқ устози Массимилиано Аллегри ҳақида гапирди. Эслатиб ўтамиз, италиялик мураббий ўтган мавсум охирида кекса синьора” раҳбарияти томонидан ишдан бўшатилган эди. Унинг Турин супер клубидаги ўрнини эса Тьяго Мотта эгаллади.

“Менимча, Аллегри исталган жойда муваффақият қозона олади, лекин мен унинг агенти эмасман. У Англия Премьер-лигасида иш топади", - деди ўтган йилнинг сентябрь ойидан бери дисквалификация туфайли майдонга тушмай келаётган 31 ёшли франциялик футболчи Football Italia нашрига берган интервьюсида.

Миш-мишларга кўра, Массимилиано Аллегри "Манчестер Юнайтед" бош мураббийи лавозимига тайинланиши мумкин. Ушбу мутахассисга шунингдек, "Милан" ҳам жиддий қизиқиш билдираётгани ҳақида хабарлар тарқалган эди.