Постекоглу: "ВАР футболни ўлдиряпти"

"Тоттенхэм" бош мураббийи Постекоглу "Челси"га қарши аламли мағлубиятдан сўнг технологияларнинг ҳакамликка таъсири ҳақида норозилик билдирди. 

69-дақиқада Сарр рақиб дарвозасини ишғол қилди, аммо ВАР бу голни бекор қилди. Сабаби – сенегаллик футболчи Мойзес Кайседодан тўпни қоидабузарлик билан тортиб олган деб топилди.

Постекоглу ушбу қарордан кейин ВАРга қарши кескин фикр билдирди:

"Тез орада ҳакамликни сунъий онг бажаради. Кейин эса у футболчиларни ҳам алмаштиради. Ҳатто, ўйинни иштирокчиларсиз ўтказишади. Бу қандай футбол бўлади?"

Мураббий ВАР тизими футболнинг руҳиятига зиён етказаётганини таъкидлади:

"ВАР пайдо бўлганда, ким бундан шундай микроскопик қарорлар қабул қилинишини кутган эди? Бу менга ёқмайди ва ҳеч қачон ёқмаган."

Постекоглу Саррнинг голи бекор қилинган вазият ҳақида ҳам фикр билдирди:

"ВАР футболни ўлдиряпти. "Яққол ва очиқ хатолар" бўйича қарор чиқариш учун 6 дақиқа вақт сарфлаш – бу ақлга сиғмайдиган нарса!" - деди австралиялик мутахассис.