Превью. "Андижон" - "Навбаҳор"

Суперлиганинг 19-турида “Андижон” 23 сентябрь санасида Наманганнинг “Навбаҳор” клубини қабул қилади. Барча эътибор бўлажак учрашувга қаратилган ва мухлисларнинг ҳам қизиқиши жуда катта.

Жамоаларнинг статистик рақамларига тўхталадиган бўлсак, бу икки жамоа чемпионат доирасида шу кунгача 53 маротаба куч синашишди. Шуларнинг 11 тасида “Андижон”нинг қўли баланд келган. “Навбаҳор”да эса 27 ғалаба бор. Яна 15 та баҳсда дуранг кузатилган. Тўплар нисбати 49\76 наманганликлар фойдасига.

Жорий мавсумнинг биринчи даврасида Наманганда ўтказилган беллашувда мезбонлар 1:0 ҳисобида ғолиб чиқишган. “Андижон” ушбу рақибини охирги бор 2021 йили Наманганда ягона гол эвазига ютган. Шунингдек, Андижондаги охирги ғалаба 2016 йилга тўғри келади. Ўшанда ҳам жамоамизнинг ғалабасига биргина гол кифоя қилган.

Биз ишонамизки, навбатдаги тўқнашувда “Андижон” ўз ғалабаси билан ишқибозларини хурсанд қилади. Шундай экан, барча мухлисларни 23 сентябрь куни “Бобур Арена”да бўлиб ўтадиган водий дербисига чорлаб қоламиз. Беллашув 18:00 да бошланади.

“Андижон” матбуот хизмати.