ПСЖ трансфери барбод бўлди

Италиянинг “Парма” клуби  ва Япония миллий терма жамоаси дарвозабони Дзион Судзукининг ПСЖга трансфери амалга ошмай қолди.

Клуб ва футболчининг ўзи билан келишувга эришилганига қарамай, парижликлар битимдан воз кечишди. Бунга комиссион тўловлар шартларининг ўзгариши сабаб бўлди.

Бу ҳақда журналист Бен Джейкобс X ижтимоий тармоғида маълум қилди.

Аввалроқ Судзукининг ПСЖга ўтиши деярли якунлангани ҳақида хабар берилган эди. Трансфердан кейин парижликлар дарвозабонни Туриннинг “Ювентус” клубига ижарага юборишни режалаштирган.

Судзуки 2024 йил ёзида Бельгиянинг “Сент-Трюйден” клубидан 7,5 млн еврога “Парма”га ўтган. Ўтган мавсумда япониялик 22 та ўйин ўтказиб, 30 та гол ўтказиб юборди ва олти марта ўз дарвозасини дахлсиз сақлади. Transfermarkt маълумотига кўра, футболчининг бозор баҳоси 30 миллион еврога тенг.