ПСЖ янги юлдуз билан музокара бошлади

Нидарландия чемпионатида порлаган «Аякс» ярим ҳимоячиси Мика Годтс «Пари Сен-Жермен» клубининг навбатдаги трансфер мақсадига айланди. 

Инсайдер Фабрицио Романо маълумотига кўра, парижликлар 21 ёшли футболчи бўйича музокараларни бошлаб юборган. Режага кўра, иқтидорли бельгиялик футболчи «Монако» ярим ҳимоячиси Магнес Аклиуш билан бирга жамоага қўшилади. Аклиуш бўйича битим якунлаш арафасида экани айтилмоқда.

Transfermarkt портали баҳосига кўра, Мика Годтснинг трансфер қиймати 35 миллион еврони ташкил этади. 

Ёш вингер «Аякс»нинг асосий таркибида шу вақтгача 113 ўйин ўтказиб, 25 та гол урган ва 27 та голли пас берган. Бельгия терма жамоаси сафида эса ҳозирча икки марта майдонга тушган.