Пётр Янми ёки Мераб Двалишвили?

UFC собиқ чемпиони Ти Жей Диллашоу россиялик Пётр Ян ва грузиялик Мераб Двалишвили ўртасидаги трилогия бўйича ўз тахминлари билан ўртоқлашди.

Диллашоунинг таъкидлашича, иккинчи жангда Ян Мераб услубига қарши керакли ечимларни топган. Айниқса, унинг тейкдаунлардан муваффақиятли ҳимояси америкаликни ҳайратда қолдирган.

Унинг сўзларига кўра, агар Двалишвили рақибини партерга ўтказа олмаса, омадсиз тейкдаун уринишлари унинг ўзига кўпроқ куч йўқоттиради.

Диллашоу Яннинг муваффақиятида корпусга йўлланган зарбалар ҳал қилувчи аҳамият касб этганини таъкидлади. Шу билан бирга, унинг фикрича, Двалишвили ҳам корпусга кўпроқ ишлаши ва ҳужумларини комбинациялар билан боғлаши лозим. 

Америкаликнинг фикрича, Ян тактикасини ўзгартирмаслиги керак. У корпусга зарба беришда, жеб ва чап оёқ зарбаларидан самарали фойдаланишда ҳамда тейкдаунлардан ҳимояланишда давом этиши керак. Чунки Мераб барибир оёққа ўтишга ҳаракат қилади ва шу сабабли Ян корпусга зарбаларга янада кўпроқ эътибор қаратиши зарур.

Диллашоу оғир кечадиган жангда Пётр Яннинг ғалаба қозонишини тахмин қилди. Унинг фикрича, сўнгги ғалаба россияликка катта ишонч бағишлаган ва у Мерабнинг услуби ҳамда чидамлилигига қандай қарши туришни англаб етган. Бироқ америкалик Мераб Двалишвилининг осонликча таслим бўлмайдиган жангчи эканини ҳам алоҳида таъкидлади.

Эслатиб ўтамиз, Пётр Ян ва Мераб Двалишвили тўқнашуви 24 октябрь куни Абу-Дабидаги "UFC 333" турнирида ўтказилади.