"Атлетико" раҳбарияти Альваресдан ғазабда

Мадриднинг «Атлетико» жамоасида аргентиналик ҳужумчи Хулиан Альварес атрофидаги вазият туфайли муҳит тобора таранглашиб бормоқда.

Маълумотларга кўра, Альварес «Барселона» сафига ўтишни истамоқда. Аммо «матрасчилар» учун муҳим футболчисини тўғридан-тўғри рақобатчи клубга бериб юбормаслик тамойил масаласига айланган. ESPN Argentina хабар қилишича, мадридликлар бош директори Мигель Анхель Хиль Марин бу ҳолатдан жуда қаттиқ норози. 

Унинг фикрича, ҳужумчининг ҳаракатлари жамоани омма олдида «кичик клуб» сифатида кўрсатиб қўйган. Яқин кунларда клуб раҳбарияти вазиятга ойдинлик киритиш ва ечим топиш учун қатор учрашувлар ўтказиши кутилмоқда.

Хулиан Альварес энди Диего Симеоне жамоасида ўйнашни хоҳламаслигини очиқ-ойдин билдирган. Яқинда «Вильярреал»га қарши ўйинда «Атлетико» мухлислари 26 ёшли футболчини майдонга тушиши биланоқ ҳуштакбозлик ва норозилик билан кутиб олди.