Рауль: «Реал» «Интер» хатоларидан фойдаланди

Мадриднинг афсонавий собиқ футболчиси Рауль Гонсалес Чемпионлар лигаси биринчи турида «Реал»нинг «Интер» устидан қозонган ғалабасига ўз муносабатини билдирди. Учрашув 2:1 ҳисоби билан «қироллик клуби» фойдасига якунланди.

Раульнинг таъкидлашича, энг асосийси — «Реал»нинг уч очко қўлга киритганидир.

«Энг муҳими, «Реал» уч очко олди. Бу осон бўлмади, чунки «Интер» аниқ ўйин тизимига эга жамоа, «Мадрид» эса марказда йўқотишларга дуч келди. «Реал» рақиб хатоларидан унумли фойдаланди. «Интер» ҳам бир қатор яхши вазиятлар яратди, уларнинг голи эса ўйинга яна қизиқиш қайтарди. Лекин умумий олганда, «Реал» мусобақани яхши натижа билан бошлади», — деди Рауль Movistar телеканалига берган интервьюсида.

Чемпионлар лигаси гуруҳ босқичининг иккинчи турида «Реал» сафарда «Рома» жамоасига қарши майдонга тушади.