«Реал» Бернарду Силвага ишонмай қўйди

Мадриднинг «Реал» клубига янги қўшилган Бернарду Силва янги мавсумни захирада бошлаши мумкин.

Ёз бошида «Реал» «Манчестер Сити»нинг собиқ сардори билан эркин агент сифатида шартнома имзолаган эди. Ўшанда бош мураббий Жозе Моуринью ватандошини жамоанинг асосий таркибида муҳим фигура сифатида кўраётгани айтилган.

Бироқ Diario AS нашри ёзишича, бу режалар қайта кўриб чиқилмоқда. Клуб раҳбарияти Португалия терма жамоаси сафида жаҳон чемпионатидаги ўйинларидан сўнг Бернарду Силванинг асосий таркибдаги ўрни бўйича аниқ қарорга келмаган.

Эслатиб ўтамиз, португалиялик яримҳимоячи «Реал» билан 2028 йил ёзигача мўлжалланган шартнома имзолаган. У 2017 йилдан буён «Манчестер Сити» шарафини ҳимоя қилиб келаётган эди.