"Реал" Чемпионлар лигасининг уч карра ғолиби кетганини эълон қилди

«Реал» клуби ўзининг расмий сайти орқали ярим ҳимоячи Дани Себальос билан йўллар ажраганини маълум қилди. Хабарга кўра, мадридликлар ва футболчи ўзаро келишув асосида шартномани бекор қилган.

Себальос «Реал» сафида 2017 йилдан буён тўп суриб келаётган эди. 2019–2021 йиллар оралиғида эса у «Арсенал» жамоасида ижара асосида ўйнади. Мадрид клуби таркибида Дани жами 215 та расмий ўйинда майдонга тушиб, 7 та гол урди ва жамоадошларига 16 бор ҳал қилувчи пас берди.

«Қироллик клуби» билан биргаликда Себальос бир марта Испания кубогини ва Қитъалараол  кубокни қўлга киритган. 

Шунингдек, икки мартадан Испания чемпиони ва мамлакат Суперкубоги соҳиби бўлган. Европа майдонида ҳам унинг ютуқлари салмоқли: Себальос «Реал» таркибида уч мартадан УЕФА Суперкубоги, Чемпионлар лигаси ва клублар ўртасидаги жаҳон чемпионати ғолиблигини қўлга киритган.

Клуб Себальосга кўрсатган хизматлари учун миннатдорлик билдириб, унга ва унинг яқинларига келгуси фаолиятида омад тилади.

Эндиликда 29 ёшли Дани Себальос эркин агент сифатида ўзининг янги жамоасини танлаши мумкин. Аввалроқ унинг «Бетис» клубига қайтиши эҳтимоли ҳақида маълумотлар пайдо бўлган эди.