“Реал” Европанинг энг ёрқин талантини ҳам оляпти

“Байер”нинг муваффақиятларида катта роль ўйнаб келаётган 22 ёшли ҳужумкор футболчи Флориан Вирц шу ёз бошқа гранд клубга ўтиши кутилмоқда.

Аслида Бундеслига чемпиони “Бавария” истеъдодли плеймейкерни ўз сафига қўшиб олиш учун ўйинчининг оғзаки розилигини олган эди. Мюнхенликлар Вирц учун Леверкузен клубига 100 миллион евро атрофида бадал пули тўламоқчи.

Бироқ ишга “Манчестер Сити” ва “Реал” каби қудратли клублар аралашганидан кейин “Байер” ўз етакчисини 150 миллион евродан камига қўйиб юбормайдиган бўлди.

Sky Sport Germany нашри журналисти Флориан Плеттенбергнинг ёзишича, “Реал” Вирцни олиш учун бир нечта трансфер амалиётини амалга оширмоқчи. Хусусан, клуб бразилиялик ҳужумкор футболчи Родригони бошқа клубларга сотиб юборганидан кейин Вирц масаласини ҳал қилишни режалаштирмоқда.

“Реал”ни бошқаришга тайёргарлик кўраётган “Байер” устози Хаби Алонсо Мадрид клубида ўзи қўллайдиган ўйин схемалари ҳақида гапириб, олдинги чизиқда Килиан Мбаппе ва Винисиус Жуниорни ўйнатишини айтди. Испаниялик мутахассис Родриго учун ўйин вақтини кафолатлагани йўқ.

Родригонинг ўзи ҳам “Реал”да иккинчи планга ўтиб қолганидан норози ва ёзги трансферлар вақтида бошқа гранд клубга ўтишни режалаштирмоқда.