"Real" hujumchisi jamoadan ketishga tayyor

"Real Madrid" hujumchisi Endrik yozgi transferlar oynasida jamoani tark etib, boshqa klubga ijaraga o‘tishga tayyorligini bildirdi. Bu haqda "Relevo" nashri xabar bermoqda.

Ta’kidlash joizki, OAV braziliyalik futbolchining "Real"da kam o‘yin amaliyotiga ega bo‘layotganini hisobga olib, Endrikni vaqtinchalik boshqa klubga o‘tishi haqida muntazam ravishda ma’lumot tarqatmoqda.

18 yoshli futbolchi joriy mavsumda "qaymoqranglilar" safida 33 ta o‘yinda ishtirok etgan bo‘lsa-da, atigi 700 daqiqa maydonda harakat qildi. Bu esa, braziliyalik futbolchi o‘rtacha har o‘yinda 21 daqiqa o‘ynaganini anglatadi.

Eslatib o‘tamiz, Endrik o‘tgan yozda "Palmeyras"dan "Real" safiga kelib qo‘shilgan edi. Transfermarkt portali Endrikning qiymatini 40 million evroga baholamoqda.