"Реал" жанжалкаш Вальвердени нима қилади?

«Реал Мадрид» ярим ҳимоячиси Федерико Вальверде учун ўтган мавсум осон кечмади. Турли манбаларга кўра, у жамоа ичида бир қатор можаролар марказида қолган. 

ОАВ хабарларига қараганда, футболчи собиқ бош мураббий Хаби Алонсо билан келишмовчиликка борган, яқинда эса машғулот пайтида Орельен Тчуамени билан жанжаллашган. 

Уругвай терма жамоасида ҳам Вальверде ва бош мураббий Марсело Бьелса ўртасида муаммолар юзага келгани ва ўртадаги зиддият терма жамоанинг мундиалдаги натижаларига таъсир қилгани ҳақида маълумотлар тарқалган.

Шунга қарамай, манбада таъкидланишича, «Реал» раҳбарияти Федерико Вальверденинг жамоадаги мақомига жиддий ўзгариш киритишни режалаштирмаяпти. Хусусан, клуб уни сардорлик ваколатларидан маҳрум этиш ниятида эмас. 

Келаси мавсумда ҳам уругвайлик футболчи мадридликлар етакчиларидан бири сифатида майдонга тушишда давом этади.

Аввалроқ хабар қилинганидек, Жозе Моуриньо ҳам Вальвердени ўз режаларида муҳим ўринда кўрмоқда. Мураббий уни ўз лойиҳасининг асосий фигураларидан бири, жамоа ўйинини ташкил этувчи марказий яримҳимоячи сифатида кўришини маълум қилган.