"Реал"нинг супер трансфери нархи ошкор бўлди

«РБ Лейпциг» ярим ҳимоячиси, вингер Ян Диоманденинг «Реал»га ўтиши амалда ҳал бўлди. Ҳозирча фақат расмийлаштириш билан боғлиқ баъзи техник масалалар қолган, холос.

Sky Sport журналисти Флориан Плеттенберг хабарига кўра, Кот-д’Ивуар терма жамоаси аъзоси Диоманде учун «Реал» томонидан тўланадиган асосий тўлов миқдори 125 миллион еврони ташкил этади. Қўшимча бонусларини ҳисобга олганда, сумма 135 миллион еврогача етиши мумкин. Айрим қийин шартлар бажарилса, умумий миқдор 140 миллион еврогача ошиши айтилмоқда.

Манбаларга кўра, клублар келишувнинг якуний шартларини муҳокама қилмоқда. Қолган масалалар ҳам ҳал этилгандан сўнг, расмий баёнот эълон қилиниши кутилмоқда. Шу билан бирга, трансфердан тушадиган маблағнинг маълум қисми Диоманденинг собиқ клуби «Леганес»га ҳам насиб қилади.

Ян Диоманде «РБ Лейпциг» сафини 2025 йилдан буён ҳимоя қилиб келмоқда. 2025/2026 йилги мавсумда у 36 ўйинда майдонга тушиб, 13 та гол урди ва 10 та голли пас муаллифи бўлди. Transfermarkt интернет портали маълумотларига кўра, футболчининг тахминий бозор қиймати 90 миллион еврога баҳоланган. Унинг немис клуби билан амалдаги шартномаси яна тўрт йилга мўлжалланган.