"Реал" қиммат трансферга қўл урмоқда

"Реал" клуби Жозе Моуриньо бош мураббий этиб тайинланганидан сўнг жамоа таркибини янгилаш бўйича ишларни фаол давом эттирмоқда.

AS нашри хабар беришича, "Қироллик клуби" Германия терма жамоаси марказий ҳимоячиси Нико Шлоттербекни "Боруссия Дортмунд"дан сотиб олиш масаласини жиддий кўриб чиқмоқда. Мадрид клуби скаутлари ўтган мавсум давомида бир неча маротаба футболчининг ўйинларини яқиндан кузатиб борган.

Жорий йил апрель ойида 26 ёшли ҳимоячи дортмундликлар билан шартномасини узайтирган эди. Янгиланган келишувда футболчини сотиб олиш учун аниқ миқдорда тўлов – 50 миллион евро компенсация пули кўрсатиб қўйилган.

Бундай сумма "Реал" бюджети учун муаммо эмас. Агар барча томонлар келишса, трансферни келгуси бир ой ичида расмийлаштириш мумкин. Бироқ битимга якуний розиликни Жозе Моуриньо бериши керак бўлади.