“Реал” янги дарвозабон топди

Асосий дарвозабон Тибо Куртуа узоқ муддатга сафдан чиққанидан кейин “Реал” унинг ўрнига муносиб ўринбосар топишга қийналди.

Натижада мадридликлар “Челси”дан Кепа Аррисабалагани ижарага олди. Гарчи испаниялик дарвозабон “Реал”да қолиш истагини билдирган бўлса-да, унинг маҳорати “Қироллик клуби” раҳбариятига унчалик маъқул келгани йўқ.

Энди мадридликлар “Лас-Пальмас” дарвозасини қўриқлаётган Альваро Вальесга эътибор қаратмоқда.

26 ёшли голгипер жорий мавсум кашфиётларидан бўлди. Альваро ҳимояси нисбатан заиф жамоада ўйнаётганига қарамай, тўққизта учрашувдан учтасида дарвозаси дахлсизлигини сақлаб қолди.

“Лас-Пальмас”да 2019 йилдан бери ўйнаётган Вальеснинг клуб билан шартномаси ёзда тугайди. “Реал” бу футболчини эркин агент сифатида бепул қўлга киритиши мумкин.