"Реал" юлдузидан юз ўгиришди

Амстердамнинг «Аякс» клуби эркин агент мақомига эга бўлган «Реал»нинг собиқ  ярим ҳимоячиси Даниель Себальос билан ҳамкорлик юзасидан олиб борилаётган музокараларни тўхтатди. 

Бу ҳақда Marca нашри хабар берди.

Маълумотларга кўра, нидерландияликлар футболчини қўлга киритишга аввал ҳам уринишган. Ҳатто Себальос «Реал» таркибида ўйнаб юрган пайтлардаёқ мадридликлар билан бевосита мулоқот қилинган. 

Бироқ бу сафар ҳам томонлар шартнома шартлари бўйича келишувга эриша олмади ва «Аякс» трансфер устидаги ишларни тўхтатиш қарорини қабул қилди. Манбаларга кўра, футболчини Эредивизия жамоаси шарафини ҳимоя қилиш имконияти етарлича қизиқтирмаган.

Даниель Себальос 2017 йилдан 2026 йилгача Мадриднинг «Реал» клуби футболчиси сифатида қайд этилган. У жамоа таркибида 215 та ўйинда майдонга тушиб, жами 16 та совринни қўлга киритган: уч мартадан Чемпионлар лигаси ва клублар ўртасидаги жаҳон чемпионати ғолиблиги, икки марта УЕФА Суперкубоги, икки бор Испания чемпиони, бир марта мамлакат кубоги ва уч марта Суперкубоги, шунингдек, ФИФАнинг қитъалараро кубогини ютиб олган.