"Реал" юлдузини ўғри урди

Испаниянинг машҳур клуби "Реал" ҳимоячиси Эдер Милитао уйи ўғирлар ҳужумига учради. El Mundo нашри ёзишича, футболчи "Барселона"га қарши сафар ўйинида майдонга тушган пайтда, унинг уйидан 350 минг евро қийматидаги қимматбаҳо ашёлар ўғирланган.

Полиция маълумотларига кўра, камида икки нафар номаълум шахс Милитаонинг уйига учинчи қаватдаги ванна хонаси ойнасидан кирган. Шу пайтда биринчи қаватда футболчининг қариндошлари телевизор орқали "эл-класико"ни томоша қилаётган бўлган. Ўғирлар Милитаонинг ётоқхонасига кириб, у ердан зеб-зийнат буюмлари ва қиммат соатларни олиб чиқиб кетишган.

Маълум қилинишича, ҳужум вақтида уйдаги сигнализация ўчирилган бўлган. Кузатув камералари ўғирларни фақат бир неча сонияга ёзиб улгурган, шундан сўнг улар камералардан бирини йўқ қилган.

Милитао ўйиндан қайтиб келгач, ўғирликни аниқлаган ва айрим, ўзи учун алоҳида қимматга эга буюмларни қайтариб олишга ҳаракат қилмоқда. Футболчи бу иш бўйича хусусий детектив ёллаган. Мутахассис фикрига кўра, ҳодиса футболчининг яқин атрофидаги кимдир томонидан режалаштирилган бўлиши эҳтимолдан холи эмас. Полиция томонидан расмий тергов ишлари олиб борилмоқда.

28 ёшли Эдер Милитао 2019 йилдан бери "Реал" шарафини ҳимоя қилиб келмоқда. Унинг илгариги клублари орасида бразилиялик "Сан-Паулу" ва португалиялик "Порту" жамоалари бор. Милитао уч карра Испания чемпиони, икки марта Чемпионлар лигаси ғолиби, Испания кубоги соҳиби, шунингдек, икки марта Испания Суперкубогини ва икки марта УЕФА Суперкубогини қўлга киритган. Бразилия терма жамоаси таркибида эса у 2019 йилда Америка кубоги совриндорига айланган.