Рио Фердинанд: «Шон-шуҳрат Роналдуга!

«Манчестер Юнайтед»нинг собиқ ҳимоячиси Рио Фердинанд Португалия терма жамоасидан Криштиану Роналдунинг кетиши ортидан юзага келган вазиятга муносабат билдирди.

Эслатиб ўтамиз, кеча Копенгагенда Данияга қарши Миллатлар лигаси учрашуви (4:2) олдидан Роналду бош мураббий Жорже Жезуш билан келишмовчилик туфайли Португалия терма жамоаси қароргоҳини тарк этгани хабар қилинган эди. ОАВ маълумотларига кўра, 41 ёшли ҳужумчи терма жамоа сафидаги фаолиятини якунлаган.

Фердинанд ўз подкастидан бир парчани эълон қилиб, унда Роналдунинг бутун карьераси ҳақида тўхталиб ўтди.

«Криштиану Роналду пайдо бўлгунча Португалия қаерда эди? Умуман нимага эришган? Катта турнирларга мунтазам чиқармиди ўзи? Ғалабалар ҳақида гапирмасак ҳам бўлади.

Мени энг кўп хафа қиладиган жиҳат – кўпчилик уни фақат охирги уч-тўрт йили орқали баҳолаяпти. У ҳали ҳам унинг ёшидаги футболчи учун ҳайратланарли статистик кўрсаткичларни қайд этяпти. Қайси чемпионатда ўйнаши муҳим эмас, бу рақамлар ҳар ҳолда жуда юқори даражада», – дейди Фердинанд.

Унинг сўзларига кўра, Роналдуни баҳолашда бутун йўлини кўз олдинга келтириш керак.

«Одамлар бир дақиқагина ўтмишга назар ташлашсин. Унинг «Ювентус»даги даврини эслашсин, у ерда нимага эришганини кўришсин. «Реал»даги йиллари, «Манчестер Юнайтед»даги вақти. Гўё у бир карьера доирасида учта алоҳида йўлни босиб ўтгандек. Учинчи даражали эмас, учта жаҳон даражасидаги карьера ҳақида гапиряпмиз», – дея таъкидлайди Фердинанд видеода.

«Роналдуга ҳурмат! Илтимос, бу йигитга нисбатан бир оз бўлса-да ҳурмат кўрсатинглар», – дея ёзиб қўйди Англия терма жамоасининг собиқ футболчиси ўз нашри остида.

Статистикага мурожаат қиладиган бўлсак, Португалия жами тўққиз марта жаҳон чемпионатига йўлланма олган. Шуларнинг олти таси Роналду 2003 йил август ойида терма жамоада дебют қилгандан кейин амалга ошган.

Европа чемпионатида ҳам шунга ўхшаш манзара кузатилади: Португалия тўққиз марта финал босқичига йўл олган бўлса, уларнинг олти таси Роналду даврига тўғри келади. Айни шу футболчи билан бирга Португалия тарихидаги илк йирик совринларни қўлга киритди: 2016 йилда Европа чемпиони бўлди, шунингдек, 2019 ва 2025 йилларда икки марта Миллатлар лигасида ғолиб чиқди.