Родридан юз ўгиришди

2024 йилги “Олтин тўп” соҳиби Родри Эрнандесни узоқ муддатдан бери ўз таркибида кўришни истаган “Қироллик клуби” раҳбарияти бу трансферга қўл урмайдиган бўлди.

Гап шундаки, клуб хўжайини Флорентино Перес тажрибали ярим ҳимоясини жамоага олиб келиш фикридан қайтган.

Бу ҳақда журналист Маттео Моретто Marca нашри учун берган интервьюсида маълум қилди.

- Менга айтишларича, “Реал” ва “Манчестер Сити” ўртасида тўғридан-тўғри мулоқот бўлган. “Сити”да “Реал” Родрини сотиб олмоқчи эмаслигини яхши билишади. Менга айтишларича, Флорентино Перес Родрини трансфер қилишни истамайди ва ҳозирча бу масалада ҳеч қандай силжиш йўқ, - деди Моретто.

Ўтган мавсумда Родри барча турнирларда 33 та ўйинда иштирок этиб, 2 та гол урган. Унинг “Манчестер Сити” билан шартномаси 2027 йил ёзигача амал қилади.

Transfermarkt маълумотига кўра, футболчининг бозор қиймати 50 миллион еврони ташкил этади.