"Рома" Дибалани Мессини кузатишга жўнатмади

Италиянинг машҳур «Рома» клуби Пауло Дибала ва Науэль Молинага Лионель Месси миллий жамоа сафидаги хайрлашув ўйини муносабати билан ўтказиладиган тадбирда иштирок этишга рухсат бермади. 

Бу ҳақда жамоа расмий сайтида эълон қилинган баёнотда маълум қилинди. 

6 октябрь куни Буэнос-Айресдаги «Монументал» стадионида Аргентина ва Бенин терма жамоалари ўртасида ўртоқлик учрашуви ўтказилади. Ушбу беллашув Месси учун Аргентина миллий жамоаси таркибидаги сўнгги ўйин бўлиши кутилмоқда. «

Рома» клуби маълумотига кўра, Дибала ва Молинани хайрлашув маросимига жўнатмаслик қарорини қабул қилишда спорт ва логистика билан боғлиқ омиллар ҳал қилувчи бўлган. Хусусан, узоқ масофали қитъалараро парвозлар ва яқинлашиб келаётган расмий учрашувлар инобатга олинган. 

- Клуб бу воқеанинг ҳар икки футболчи учун қай даражада муҳим эканини, уларни Лионель Месси билан кўп нарса боғлаб туражагини яхши тушунади. Аммо қарор узоқ қитъалараро сафар ва расмий ўйинлар тақвимига яқинлиги билан боғлиқ спорт ҳамда логистик сабабларга асосланади. "Рома" Лионель Месси ва унинг ўзига хос карьерасига чуқур ҳурмат изҳор этади ҳамда унга ва Аргентина футбол ассоциациясига ўзига хос, эсда қоларли кеча тилайди, — дейилади клуб баёнотида. 

Аввалроқ La Gazzetta dello Sport нашри хабар беришича, Дибала ва Молина ушбу тадбирга мухлис сифатида таклиф этилган. Сафар амалга оширилганда, футболчиларга икки марта қитъалараро парвоз қилишга тўғри келар, шунингдек, 11 октябрь куни «Комо»га қарши Италия чемпионати учрашуви олдидан камида уч кунлик машғулотларни ўтказиб юбориш хавфи бор эди. 

39 ёшли Лионель Месси Испания чемпионати, «Барселона» ва Аргентина терма жамоасининг тарихида энг кўп гол урган футболчи ҳисобланади. У футбол тарихида саккиз марта «Олтин тўп» совринини қўлга киритган ягона ўйинчи сифатида ҳам рекордчи. 

Месси Аргентина терма жамоаси сафида 207 та ўйин ўтказиб, 125 та гол урган. Миллий жамоа билан бирга у икки марта Америка кубогини (2021, 2024) қўлга киритган, 2022 йилги жаҳон чемпионатида ғолиб чиққан, 2014 ва 2026 йилларда жаҳон чемпионатида кумуш медаллар соҳибига айланган. Шунингдек, 2022 йилда «Финалиссимо» мусобақасида ҳам терма жамоа билан бирга чемпионликни қўлга киритган.