Роналду «Челси»га ўтиши мумкин эди
Томас Тухель қаршилиги сабаб Криштиану Роналдунинг «Челси»га ўтиши амалга ошмай қолгани маълум бўлди.
«The Athletic» нашрининг ёзишича, «Ал-Наср» клуби ҳужумчиси Криштиану Роналду ўз вақтида Лондоннинг «Челси» жамоасига ўтиши мумкин бўлган.
Манбага кўра, «Челси»нинг ўша пайтдаги ҳаммулкдори Тодд Бёли Роналдуни «Стэмфорд Бридж»га олиб келиш ғоясига жуда жиддий ёндашган. Португалиялик юлдуз «Манчестер Юнайтед» сафида иккинчи бор тўп сураётган даврда Бёли уни трансфер қилишни қатъий режалаштирган.
Айтилишича, Бёли Роналдунинг агенти Жорже Мендеш билан шахсан учрашиб, ижобий руҳда кечган музокаралар ўтказган. Клуб раҳбари келишув амалга ошишига ишонган, аммо ўша вақтда «Челси»ни бошқариб турган Томас Тухель бу трансферга кескин қарши чиққан. Немис мутахассиси таклифни маъқулламагани сабаб Роналдунинг Лондон клубига ўтиши масаласи ёпилган.
Криштиану Роналду 2022 йил охирида «Манчестер Юнайтед»ни тарк этиб, Саудия Арабистонининг «Ал-Наср» жамоасига ўтди. Жорий мавсумда 41 ёшли форвард етти учрашувда майдонга тушиб, учта гол урди.
Изоҳлар (0)