Роналду Европа клубига ўтади

Португалия терма жамоаси сардори Криштиану Роналдунинг яқин йилларга мўлжалланган режалари маълум бўлди. TVI Portugal тарқатган маълумотларга кўра, 41 ёшли ҳужумчи ўзининг кейинги фаолияти борасида қарор қабул қилган. 

Манбага кўра, 2026 йилдаги жаҳон чемпионати якунланганидан сўнг Роналду миллий жамоа сафидаги ўйинларига нуқта қўяди.

Шунингдек, португалиялик юлдуз шундан кейин Саудия Арабистонининг "Ан-Наср" клубида яна бир мавсум қолиши кутилмоқда. Унинг амалдаги шартномаси 2027 йилгача мўлжалланган.

Шундан сўнг Роналду яна Европа футболига қайтишни режалаштирган. Манба маълумотича, афсонавий форвард охирги мавсумини Европанинг бир клубида ўтказишни ва 2028 йилда, 43 ёшида профессионал фаолиятини якунлашни ният қилган.

Эслатиб ўтамиз, ҳозирда Криштиану Роналду 2026 йилги жаҳон чемпионатида иштирок этаётган Португалия терма жамоаси ихтиёрида. У учун бу мусобақа фаолиятидаги олтинчи жаҳон чемпионати бўлиб, бу рекорд кўрсаткич ҳисобланади. Португалия терма жамоаси "K" гуруҳида Конго Демократик Республикаси, Ўзбекистон ва Колумбия терма жамоаларига қарши баҳс олиб бормоқда.