Роналду мухлисларни жазолашни талаб қилди

«Ан-Наср» клуби ҳужумчиси Криштиану Роналду Саудия Арабистони чемпионати доирасидаги баҳс пайтида мухлислар томонидан ҳақоратга учраган «Ал-Ҳилол» ярим ҳимоячиси Рубен Невешни ҳимоя қилди. 

«Ат-Таавун» — «Ал-Ҳилол» учрашуви (0:6) чоғида мезбон жамоа ишқибозлари Невешни қўзғаш мақсадида ўтган йили вафот этган Португалия терма жамоасидаги унинг собиқ жамоадоши Диогу Жота исмини баланд овозда айта бошлашган. 

Бу ҳаракатга жавобан Рубен Невеш трибуналар томон қўл кўтариб, аввал осмонни, сўнгра ўриндиқларда ўтирган мухлисларни кўрсатган. Ушбу вазият акс этган видео ижтимоий тармоқларда тарқалди.

Криштиану Роналду ушбу ҳолат юзасидан Instagram тармоғида изоҳ қолдириб, лига раҳбариятини чора кўришга чақирди: «Лига бундай хулқ-атвор учун мухлисларни жазолаши ва тегишли чоралар кўриши шарт. Бу энди футбол эмас, чегара белгиланиши керак. Шундай йўл тутадиган одамлар стадионга кириш ҳуқуқидан бутунлай маҳрум этилсин», — дея таъкидлаган португалиялик юлдуз.